Hövzə Xəbər Agentliyinin verdiyi məlumata əsasən,Seyid Zuvvar Hüseyn Nəqəvi, Pakistan Cəfəri Şurasının başçısı, Höccətul-İslam vəl-müslimin Seyid İbrahim Rəisinin Pakistana son səfərini regional əməkdaşlıqlar yolunda mühüm və taleyüklü bir dönüş nöqtəsi kimi dəyərləndirib. O, bu səfəri Şərqin yeni-yeni yüksələn gücləri arasında siyasi və iqtisadi birliyin gücləndirilməsi üçün dönüş nöqtəsi adlandırıb.

O, regionda baş verən son hadisələrə toxunaraq bildirib ki, bu tarixi səfər İran, Pakistan və Çin arasında üçtərəfli əlaqələrin gücləndirilməsi yolunda ciddi bir addımdır və bu da həmin ölkələrin əməkdaşlıq, müstəqillik və həmrəyliyə əsaslanan yeni bir regional nizam yaratmaqda ortaq iradəsini göstərir.

Seyid Zuvvar Nəqəvi əlavə edib: İranın Çin Pakistan iqtisadi layihəsinə qoşulmaq və İpək Yoluna bağlanmaq istəyi təkcə regional ticarət üçün yeni üfüqlər açmayıb, eyni zamanda beynəlxalq diplomatiya səhnəsində qlobal güc mərkəzinin Şərqə yönəlməsi ilə bağlı açıq bir mesaj göndərmişdir.

O vurğulayıb ki, İran, Pakistan, Çin və Mərkəzi Asiya ölkələri arasında əməkdaşlıq regionu Qərbin hegemonluğundan azad edə və qlobal güc balansında yeni bir tarazlıq yarada bilər.

Pakistanlı alim eyni zamanda əməkdaşlığın iqtisadi sahədən kənara çıxaraq genişləndirilməsini istəyib və bildirib: Bu strateji ittifaq təhlükəsizlik, mədəniyyət, təhsil və enerji sahələrini də əhatə etməlidir ki, hərtərəfli və davamlı bir tərəfdaşlığa çevrilsin.

Seyid Zuvvar Hüseyn Nəqəvi Amerikanın və sionist rejimin region işlərinə artan müdaxilələrinə toxunaraq vurğulayıb ki, hazırkı şəraitdə İran, Pakistan və Çin arasında sıx ittifaq strateji bir zərurətdir və bu ittifaq dünya məzlumlarını, xüsusilə Fələstin xalqını müdafiə edən bir mərkəzə çevrilməli, sionist zülm və təcavüzlərə qarşı vahid və güclü bir səs olmalıdır.

Sonda o, ümid etdiyini bildirib ki, bu səfər İran və Pakistan arasında ikitərəfli əlaqələrin gücləndirilməsi ilə yanaşı, Kəşmir xalqı üçün də aydın və ümidverici bir mesaj verəcəkdir elə bir mesaj ki, məzlum xalqların hüquqlarının müdafiəsi üçün vahid bir cəbhənin formalaşmasına zəmin yaradacaq və ədalətlə insan ləyaqətinə əsaslanan regional həmrəyliyin möhkəmləndirilməsi istiqamətində mühüm addım olacaq.

Xəbərin sonu